人人都識講「防人之心不可無」，但係極品八婆好難防。以前返工遇過一個真。極品八婆，姑且叫佢C啦，C係一個樣子中上嘅大姐姐，admin team，對人好客氣，cross team好似好多朋友咁，我好快都同佢熟絡咗，經常一齊放飯，OT一齊叫外賣。
直到有一次佢要搵我幫手做採購，我問點解唔搵同組跟開嘅同事幫忙，最初佢答大家太忙，然後又話其實阿姐好憎佢，叫同事杯葛佢。我見義勇為就幫咗一次。然後佢搵我嘅次數越來越多，間唔中又會見到佢上網話自己被針對，被人傳壞話等等。有時成班同事約食飯，我想約埋C，佢都會話某某唔鍾意佢，所以不了。
直至有一次見佢被阿姐召入房好耐，然後佢嘭門衝出來，之後神奇嘅事就發生喇！當晚公司幾部打印機突然開始print上萬頁嘅data sheet出來，intern妹妹唔識搞搵我救命，我叫佢快快打去IT 支援熱線，IT支援哥哥好有耐性咁教佢入print spooler删晒所有待印檔案，有驚無險搞掂，打印機無事，只係浪費咗一兩箱紙咁多。事後翻查，有admin權限嘅只有老細、admin team阿姐同C，老細意有所指叫我唔好再同C往來咁多，兩日後C就辭職，原因不願透露，亦無人同佢farewell。
大半年之後有行家朋友打來搵我，話我係咪跟歐洲shipment出錯累公司蝕兩百幾萬，我當然答並無此事，唔信可以問我老細。朋友話知道我唔係咁嘅人，只係C去佢度見工，話我害公司蝕錢，搵佢頂罪炒魷。我公司行頭細，有其他行家都聽過呢個版本流傳，好彩朋友幫忙闢謠咋！江湖傳聞C已被blacklist，但係知道C咁陰毒之後，真係shock咗好耐！
